بلوچستان حکومت نے بلوچستان ایجوکیشن اینڈاؤمنٹ فنڈ (بی ای ای ایف) کے تحت بیرونِ ملک مکمل فنڈڈ پی ایچ ڈی اسکالر شپس کا اعلان کیا ہے۔ اے آر وائی نیوز کے مطابق اس پروگرام کے تحت ہر سال صوبے کے دس باصلاحیت اور مستحق طلبہ کو تسلیم شدہ بین الاقوامی جامعات میں تعلیم کے لیے اسکالر شپ دی جائے گی۔
وزیراعلیٰ بلوچستان میر سرفراز بگٹی نے اس اقدام کو صوبے کے روشن مستقبل کی جانب سنگِ میل قرار دیا اور کہا کہ بلوچستان کے نوجوانوں کا دنیا کی بہترین جامعات کی طرف سفر باضابطہ طور پر شروع ہو چکا ہے۔ ان کے مطابق یہ منصوبہ صوبے کے مستقبل کو بدلنے کی جانب قدم ہے تاکہ مواقع کی دوڑ میں یہاں کے نوجوان دنیا سے پیچھے نہ رہیں۔
وزیراعلیٰ نے کہا کہ اب عالمی سطح کی جامعات میں داخلہ مقامی طلبہ کے لیے حقیقت بن سکے گا اور ان اسکالر شپس کو انہوں نے آنے والی نسلوں کے لیے امید، علم اور ترقی کا نیا دروازہ قرار دیا۔ ان کا یہ بھی کہنا تھا کہ صوبائی حکومت تعلیم، شعور اور ترقی کے مواقع فراہم کر کے دہشت گردی کا مقابلہ کر رہی ہے، اور تعلیم و تحقیق میں نمایاں مقام حاصل کرنے والے نوجوان ہی صوبے کا اصل مستقبل ہیں۔
ذرائع: اے آر وائی نیوز
