دفتر خارجہ نے پیر کو بتایا کہ اقوام متحدہ کے سیکریٹری جنرل انتونیو گوتریس آج منگل کو پاکستان پہنچیں گے اور 6 سے 8 اکتوبر تک تین روزہ سرکاری دورے پر ملک میں قیام کریں گے۔ وہ نائب وزیراعظم و وزیر خارجہ اسحاق ڈار کی دعوت پر آ رہے ہیں۔
دفتر خارجہ کے مطابق دورے کے دوران وہ صدر آصف علی زرداری، وزیراعظم شہباز شریف، اسحاق ڈار اور چیف آف ڈیفنس فورسز و آرمی چیف فیلڈ مارشل عاصم منیر سے ملاقاتیں کریں گے، جن میں علاقائی اور بین الاقوامی پیش رفت پر تبادلۂ خیال کیا جائے گا۔
پروگرام کے مطابق سیکریٹری جنرل بھارت اور پاکستان میں اقوام متحدہ کے فوجی مبصر گروپ (یو این ایم او جی آئی پی) کے ہیڈکوارٹر کا دورہ کریں گے اور نیشنل ڈیزاسٹر مینجمنٹ اتھارٹی (این ڈی ایم اے) میں بریفنگ میں شرکت کریں گے۔ دیگر مصروفیات بھی شیڈول میں شامل ہیں۔
دفتر خارجہ کا کہنا ہے کہ دورے میں اقوام متحدہ کے ساتھ پاکستان کے دیرینہ تعاون، کثیرالجہتی نظام کی حمایت، عالمی امن و سلامتی کے لیے کوششوں اور آفات سے نمٹنے کی تیاری و قبل از وقت انتباہی نظام کے شعبے میں پیش رفت کو اجاگر کیا جائے گا۔
ذرائع: جیو نیوز
