انٹرنیشنل لیبر آرگنائزیشن (آئی ایل او) کے ڈائریکٹر جنرل گلبرٹ ایف ہونگبو 6 اکتوبر سے چار روزہ سرکاری دورے پر پاکستان آ رہے ہیں۔ ڈان کی رپورٹ کے مطابق دورے کا مقصد ادارے کی پاکستان اور اس کے سہ فریقی شراکت داروں کے ساتھ دیرینہ شراکت کو مضبوط بنانا اور باعزت روزگار اور سماجی انصاف سے متعلق مشترکہ ترجیحات کو آگے بڑھانا ہے۔
دورے کے دوران وہ وزیراعظم شہباز شریف، صدر آصف علی زرداری اور وزیر برائے سمندر پار پاکستانی و انسانی وسائل کی ترقی چوہدری سالک حسین سے ملاقاتیں کریں گے۔ کراچی اور لاہور کے دورے میں وہ سندھ اور پنجاب کے وزرائے اعلیٰ سے بھی ملیں گے۔
کراچی میں ایمپلائرز فیڈریشن آف پاکستان کی 75ویں سالگرہ کی تقریب ان کے دورے کا نمایاں حصہ ہوگی۔ وہ گڈانی شپ ریسائیکلنگ یارڈز بھی جائیں گے، جہاں آئی ایل او کے تعاون سے جہاز توڑنے کے شعبے میں محفوظ اور پائیدار طریقوں کے فروغ کے لیے کام جاری ہے۔ آئی ایل او پاکستان کے مطابق دورہ پیشہ ورانہ حفاظت و صحت، کام کے حالات اور ماحولیاتی طریقوں سے متعلق فریقین سے بات چیت کا موقع فراہم کرے گا۔ لاہور میں وہ مزدور نمائندوں سے ملاقات کریں گے اور ملت ٹریکٹرز کا دورہ کریں گے۔
ذرائع: ڈان
