پاکستان میڈیکل اینڈ ڈینٹل کونسل (پی ایم ڈی سی) نے پیر کو اعلان کیا ہے کہ بیرون ملک طب یا دندان سازی کی تعلیم کے خواہش مند پاکستانی طلبہ کے لیے میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) پاس کرنا اب لازمی نہیں رہا۔ ایکس پر جاری نوٹس کے مطابق کونسل نے یہ فیصلہ 14 ستمبر کو ہونے والے اجلاس میں کیا تھا۔ نوٹس میں فیصلے کی وجوہات بیان نہیں کی گئیں۔
ڈان کے مطابق پی ایم ڈی سی کے صدر ڈاکٹر رضوان تاج نے بتایا کہ پارلیمانی کمیٹی نے سفارش کی تھی کہ بیرون ملک پڑھنے کے خواہش مند طلبہ کو ایم ڈی کیٹ پاس کرنے پر مجبور نہ کیا جائے۔ سینیٹ کی قائمہ کمیٹی برائے قومی صحت نے اس پالیسی کے تضاد کی نشاندہی کی تھی، جبکہ ذیلی کمیٹی نے جون میں اس شرط کی قانونی حیثیت پر سوالات اٹھائے تھے۔ کمیٹی نے تجویز دی تھی کہ عمومی پابندی کے بجائے غیر معیاری غیر ملکی میڈیکل اداروں کی فہرست شائع کی جائے۔
کونسل کے ایک اہلکار نے ڈان کو بتایا کہ اگر کوئی طالب علم بیرون ملک تعلیم کے دوران پاکستان کی کسی جامعہ میں منتقلی چاہے تو اسے نیشنل ایگزامینیشن بورڈ (این ای بی) کا امتحان دینا ہوگا۔ اسی طرح بیرون ملک سے تعلیم مکمل کرکے پاکستان میں پریکٹس کے خواہش مند گریجویٹس کو غیر ملکی میڈیکل گریجویٹس کے رجسٹریشن امتحان میں کامیاب ہونا لازمی ہوگا۔
ذرائع: ڈان
