نیشنل ایمرجنسی آپریشنز سینٹر برائے انسداد پولیو (این ای او سی) نے پیر کو بتایا کہ پاکستان میں رواں سال پولیو کا چھٹا کیس رپورٹ ہوا ہے۔ ادارے کے بیان کے مطابق متاثرہ بچہ خیبر پختونخوا کے ضلع خیبر کی تحصیل جمرود کی یونین کونسل غنڈی اے کا رہائشی سات سالہ لڑکا ہے۔
بیان میں کہا گیا کہ پاکستان پولیو ایریڈیکیشن انیشی ایٹو نے کیس کی جامع تحقیقات شروع کر دی ہیں۔ ردعمل کے طور پر بڑی عمر کے بچوں کو انسداد پولیو کے قطروں اور حفاظتی ٹیکوں دونوں کی مہم چلانے کے ساتھ معمول کی حفاظتی ٹیکہ کاری بہتر بنانے سمیت اضافی اقدامات بھی زیر غور ہیں۔
ڈان کے مطابق رواں سال کے چھ میں سے پانچ کیس خیبر پختونخوا سے آئے ہیں، جن میں سے چار بنوں ڈویژن کے ہیں۔ تازہ کیس پانچویں کیس کے سامنے آنے کے ایک ہفتے سے بھی کم وقت بعد رپورٹ ہوا، جو 29 ستمبر کو سامنے آیا تھا۔ یہ پیش رفت ایسے وقت میں ہوئی ہے جب 27 ستمبر کو ختم ہونے والی ہفتہ بھر کی ذیلی قومی مہم میں 2 کروڑ 82 لاکھ سے زائد بچوں کو ویکسین دی گئی تھی۔ شمال مغرب میں سنگین سکیورٹی چیلنجز انسداد پولیو کوششوں کے لیے خطرہ ہیں۔ پولیو انتہائی متعدی اور ناقابل علاج بیماری ہے جو عمر بھر کی معذوری اور بعض اوقات موت کا سبب بن سکتی ہے، تاہم ویکسین سے اس سے بچاؤ ممکن ہے۔ پاکستان اور افغانستان دنیا کے وہ دو ممالک ہیں جہاں پولیو اب بھی موجود ہے۔
ذرائع: ڈان
