ممبئی: بھارتی فلمی اداکار ٹائیگر شروف ممبئی کے علاقے جوہو میں اتوار کی شام پیش آنے والے فائرنگ کے ایک واقعے میں محفوظ رہے، تاہم ان کا ڈرائیور اور ایک راہگیر زخمی ہو گئے۔ بھارتی اخبار دی ہندو نے ایک عہدیدار کے حوالے سے بتایا کہ واقعہ شام تقریباً سات بجے اس وقت پیش آیا جب اداکار اپنی کام کی جگہ سے روانہ ہو رہے تھے۔
ممبئی زون دو کے ڈپٹی کمشنر پولیس موہت گرگ کے مطابق ٹائیگر شروف کے ڈرائیور فردوس کے بائیں ہاتھ میں چوٹ آئی جبکہ چوہان نامی ایک راہگیر بھی زخمی ہوا جسے اسپتال منتقل کر دیا گیا۔ رپورٹس کے مطابق مہاراشٹر کے وزیراعلیٰ اور وزیر داخلہ دیویندر فڑنویس نے ممبئی پولیس کے کمشنر دیوین بھارتی کو واقعے کی تحقیقات اور ذمہ داروں کے خلاف کارروائی کی ہدایت کی ہے۔
مہاراشٹر کے نائب وزیراعلیٰ ایکناتھ شندے نے دی ہندو سے گفتگو میں کہا کہ ممبئی کے شہریوں کا تحفظ حکومت کی ترجیح ہے اور فلمی صنعت کو دھمکانے کی کوشش کرنے والوں کو بخشا نہیں جائے گا۔ انہوں نے 1990 کی دہائی کی گینگ وار کا حوالہ دیتے ہوئے کہا کہ اس وقت ممبئی پولیس نے اسے روکا تھا اور اب بھی ایسے گروہوں کو برداشت نہیں کیا جائے گا۔
فلمی صنعت سے وابستہ کارکنوں کی تنظیم آل انڈین سینی ورکرز ایسوسی ایشن نے واقعے پر گہرے دکھ اور صدمے کا اظہار کیا۔ تنظیم کے بیان میں کہا گیا کہ یہ کوئی الگ تھلگ واقعہ نہیں، اس سے قبل سلمان خان کی رہائش گاہ کے باہر فائرنگ، سیف علی خان پر چاقو سے حملے، فلم ساز روہت شیٹی کے گھر کے باہر فائرنگ اور کامیڈین کپل شرما کے کیفے پر باربار حملوں جیسے واقعات پیش آ چکے ہیں۔
تنظیم کا کہنا تھا کہ فلمی صنعت سے وابستہ افراد کو یکے بعد دیگرے نشانہ بنا کر خوف کی فضا پیدا کی جا رہی ہے اور اس کے بقول گینگسٹروں کا مقصد شخصیات کو دھمکا کر بھتہ وصول کرنا ہے۔ تنظیم نے الزام لگایا کہ باربار کے واقعات کے باوجود حکومت اور پولیس ان حملوں کو روکنے میں ناکام رہی ہیں، اور بالی ووڈ کو صرف بیانات کی نہیں بلکہ حقیقی تحفظ کی ضرورت ہے۔
آل انڈین سینی ورکرز ایسوسی ایشن نے وزیراعلیٰ فڑنویس سے مطالبہ کیا کہ حملہ آوروں اور ان کو احکامات دینے والوں کو فوری گرفتار کیا جائے، بھتہ خوری کے نیٹ ورک کو توڑا جائے، فلمی شخصیات اور ان کے اہلِ خانہ کو مناسب سکیورٹی فراہم کی جائے اور حملوں کو روکنے میں ناکامی کی ذمہ داری طے کی جائے۔
بھارتی میڈیا کے مطابق سوشل میڈیا پر ایک غیر تصدیق شدہ پوسٹ میں حملے کی ذمہ داری قبول کی گئی ہے، جس میں سلمان خان کے ساتھ کام کرنے والوں کو دھمکی دی گئی۔ تاہم حکام نے ابھی تک اس پوسٹ کی صداقت پر کوئی بیان نہیں دیا۔ ٹائیگر شروف کی جانب سے واقعے پر کوئی باضابطہ ردعمل اب تک رپورٹ نہیں ہوا۔
ذرائع: ڈان، دی ہندو، اے این آئی
