پنجاب کے اسکول ایجوکیشن ڈیپارٹمنٹ نے صوبے کے سرکاری اسکولوں میں سیکیورٹی انتظامات کی نگرانی کے لیے نئی ہدایات جاری کی ہیں۔ ہدایات کے مطابق اسکولوں کے سربراہان کو گوگل پلے اسٹور سے "ایجوکیشنل انسٹی ٹیوشن سیکیورٹی اسٹیٹس” ایپ ڈاؤن لوڈ کر کے رجسٹریشن مکمل کرنی ہوگی۔
کیا معلومات دینی ہوں گی؟
اسکول انتظامیہ کو اپنے ادارے میں موجود تمام حفاظتی اقدامات کی مکمل اور درست تفصیل ایپ میں درج کرنی ہوگی، اور کسی بھی تبدیلی کی صورت میں فوری طور پر معلومات اپ ڈیٹ کرنی ہوں گی۔ محکمے کے مطابق تمام سرکاری اسکولوں کو یہ عمل دو دن کے اندر مکمل کرنا ہے۔
محکمہ تعلیم کا کہنا ہے کہ اس نظام کا مقصد سرکاری اسکولوں میں سیکیورٹی انتظامات کی تازہ معلومات حاصل کرنا اور ان کی نگرانی کو بہتر بنانا ہے۔ محکمہ ایپ کے ذریعے اسکولوں کی جانب سے معلومات کی فراہمی اور ہدایات پر عمل درآمد کی نگرانی کرے گا۔
