اسپین میں بدھ کے روز دو تیز رفتار ٹرینوں کے تصادم میں کم از کم 64 افراد ہلاک ہو گئے۔ امدادی کارکن حادثے کے مقام پر ملبے میں مزید لاشوں کی تلاش کر رہے ہیں۔ خبر رساں اداروں رائٹرز اور اے ایف پی کے مطابق یہ رواں سال ملک میں ریلوے کا دوسرا مہلک حادثہ ہے۔
وسطی علاقے کاستیا لا مانچا کے رہنما ایمیلیانو گارسیا پیج نے جائے حادثہ پر صحافیوں کو بتایا کہ ہلاکتوں کی تعداد تقریباً 64 ہے اور اس میں مزید اضافے کا امکان ہے۔ اس سے قبل ہلاکتوں کی تعداد 31 بتائی گئی تھی۔ ریلوے آپریٹر ایڈف کے مطابق میڈرڈ اور اندلسیہ کے درمیان تیز رفتار ریلوے لائن پر ٹریفک معطل کر دی گئی ہے، اور اس کی وجہ دو ٹرینوں کا پیچھے سے تصادم بتایا گیا ہے۔
علاقائی حکومت کے ترجمان کے مطابق رینفے اور ایریو کی ٹرینیں مقامی وقت کے مطابق صبح نو بجے کے فوراً بعد ٹکرائیں، جو پاکستانی وقت کے مطابق دوپہر ایک بجے کا وقت بنتا ہے۔ تصادم سے ایریو کی دو بوگیاں پٹری سے اتر گئیں۔ ترجمان نے کہا کہ حادثے کی وجہ اور زخمیوں کی تعداد کا تعین ابھی کیا جا رہا ہے۔ ایڈف نے بتایا کہ حادثہ میڈرڈ سے سیویل جانے والی لائن پر پیش آیا۔ اے ایف پی کو دستیاب سول گارڈ کی ویڈیو کے مطابق مقام ٹولیڈو صوبے میں میڈرڈ سے تقریباً 150 کلومیٹر جنوب میں واقع ہے۔
جائے حادثہ پر سینکڑوں ایمبولینسیں، میتیں لے جانے والی گاڑیاں اور ہیلی کاپٹر موجود تھے۔ ایک ٹرین کی کئی بوگیاں بلند پٹری پر کھڑی تھیں، جبکہ مڑی ہوئی دھاتی چادریں اور ملبہ پشتے کے نیچے بکھرا ہوا تھا جہاں کم از کم تین بوگیاں گر گئی تھیں۔ خون آلود کپڑوں اور پٹیوں میں لپٹے مسافر سڑک کے ساتھ پیدل جاتے دکھائی دیے، جنہیں قریبی قصبوں سے لائی گئی پانی کی بوتلیں رضاکار فراہم کر رہے تھے۔ ایک مسافر میگوئل نے ریڈیو کوپے کو بتایا کہ انہوں نے دس سیکنڈ تک جاری رہنے والی زوردار گڑگڑاہٹ سنی اور کھڑکی سے دوسری ٹرین کا تباہ شدہ حصہ دیکھا۔
قریبی قصبے اوردا کے میئر مانوئل گالان کے مطابق ہنگامی خدمات نے کونسل سے مسافروں اور زخمیوں کے لیے ایک کھیل ہال سمیت ہنگامی سہولتیں تیار کرنے کا کہا ہے۔ وزیرِ اعظم پیدرو سانچیز نے، جو آئندہ ماہ انتخابات میں دوبارہ منتخب ہونے کے خواہاں ہیں، حادثے پر شدید صدمے کا اظہار کیا اور متاثرہ خاندانوں سے اظہارِ یکجہتی کیا۔ ان کا آج کا شیڈول منسوخ کر دیا گیا، جبکہ اپوزیشن پیپلز پارٹی نے انتخابی مہم کی تمام تقریبات روک دیں۔
یاد رہے کہ جنوری میں اندلسیہ کے علاقے آداموس کے قریب ایک ٹرین پٹری سے اتر کر مخالف سمت سے آنے والی ٹرین سے ٹکرا گئی تھی، جس میں 46 افراد ہلاک ہوئے تھے۔ اس حادثے کے بعد ریلوے کی دیکھ بھال پر سرمایہ کاری کی سطح پر بحث شروع ہوئی تھی۔ وزیرِ اعظم شہباز شریف اور صدر آصف علی زرداری نے بھی حادثے پر گہرے دکھ کا اظہار کرتے ہوئے اسپین کے عوام اور متاثرہ خاندانوں سے تعزیت کی ہے۔
ذرائع: ڈان (رائٹرز / اے ایف پی)
