اسلام آباد کی انسداد دہشت گردی عدالت (اے ٹی سی) نے سابق اسپیکر قومی اسمبلی اور پی ٹی آئی رہنما اسد قیصر کی قبل از گرفتاری ضمانت کی درخواست خارج کر دی ہے۔ مقدمہ پی ٹی آئی کے سنگجانی جلسے سے متعلق ہے اور تھانہ سنگجانی میں درج ہے۔
ڈان کے مطابق جمعرات کو سماعت کے دوران اسد قیصر کے وکیل نے ان کی حاضری سے استثنیٰ کی درخواست دی۔ جج طاہر عباس سپرا نے ریمارکس دیے کہ ملزم فروری سے عدالت میں پیش نہیں ہوئے اور استثنیٰ کی درخواست پر ان کے دستخط بھی موجود نہیں، جس کے بعد عدالت نے ضمانت کی درخواست خارج کر دی۔
دیگر درخواستیں
دوسری جانب پی ٹی آئی کے دو ارکان قومی اسمبلی عادل بازئی اور داور کنڈی نے نقص امن عامہ (ایم پی او) قانون کے تحت اپنی نظربندی کو اسلام آباد ہائی کورٹ میں الگ الگ درخواستوں کے ذریعے چیلنج کیا ہے۔ ان کی جانب سے سابق وفاقی وزیر بابر اعوان وکیل ہیں۔
